Sərbəst güləşçimiz Hacı Əliyev (65 kq) Tokio Olimpiadasında Azərbaycanın aktivinə növbəti gümüş medalı yazdırıb.

İdmançımız finalda Yaponiya təmsilçisi, dünya və ikiqat Asiya çempionu Takuto Otoquro ilə qarşılaşıb. Gərgin idman mübarizəsi şəraitində keçən görüş 5:4 hesabı ilə rəqib güləşçinin xeyrinə başa çatıb. Beləliklə, Hacı Əliyev “Tokio-2020”də gümüş medalla kifayətlənməli olub.

Olimpiadada mübarizəyə səkkizdəbir final mərhələsindən başlayan pəhləvanımız bütün qarşılaşmalarda yüksək peşəkarlıq nümayiş etdirib. Birinci görüşdə seneqallı Adama Diattaya qalib gələn (4:0) Hacı Əliyev dörddəbir finalda Qazaxıstan idmançısı Daulet Niyazbekovu 9:1 hesabı ilə məğlub edib. Yarımfinalda Hindistan təmsilçisi Bacranq Bacranq ilə görüş Azərbaycan pəhləvanının 12:5 hesablı qələbəsi ilə başa çatıb.

Nüfuzlu beynəlxalq turnirlərdə ölkəmizin idman şərəfini layiqincə qoruyan Hacı Əliyev üçqat dünya (2014, 2015, 2017) və üçqat Avropa (2014, 2018, 2019) çempionudur. O, “Rio-2016” Olimpiya Oyunlarının bürünc mükafatçısıdır. Bakıda keçirilən I Avropa Oyunlarında bürünc medala sahib olan idmançımız dörd il sonra “Minsk-2019”da aktivinə qızıl medal yazdırıb. Hacı Əliyev “Bakı-2017” IV İslam Həmrəyliyi Oyunlarının da çempionu adını qazanıb. O, güləş üzrə dünya kuboku yarışlarında bir gümüş, iki bürünc medala sahib olub.

Beləliklə, hazıra Azərbaycan millisinin aktivində 2 gümüş və 3 bürünc medal var. Gümüş medalları ölkəmizin aktivinə Hacı Əliyev və karateçi Rafael Ağayev, bürünc medalları isə cüdoçu İrina Kindzerska, boksçu Alfonso Dominges və yunan-Roma güləşçisi Rafiq Hüseynov yazdırıblar.