Mayın 16-18-də Çinin Quançjou şəhərində keçirilən “GİTF 2024” (Quançjou Beynəlxalq Turizm Sərgisi) sərgisində ilk dəfə Azərbaycanın turizm imkanları sərgilənir.

Bu barədə Dövlət Turizm Agentliyi məumat yayıb.

Bildirilir ki, sərgidə ölkəmizi Azərbaycan Turizm Bürosu ilə birgə “Azərbaycan Hava Yolları” (AZAL), “Şahdağ” Turizm Mərkəzi və Qoruqları İdarəetmə Mərkəzi daxil olmaqla, ümumilikdə 6 yerli tərəfdaş təmsil edir.

Sərginin ilk günü ATB-nin Çindəki təmsilçiliyi tərəfindən destinasiya təqdimatı keçirilib, təqdimat zamanı Azərbaycanın turizm imkanları ətraflı nümayiş etdirilib.

Stendin ziyarətçilərinə Azərbaycanın tarixi, turizm potensiallı məkanları, milli mətbəx nümunələri, şərabçılıq, ölkəmizin UNESCO-nun Ümumdünya İrs Siyahısına daxil edilmiş maddi mədəni irs nümunələri, o cümlədən işgüzar turizm imkanları haqqında geniş məlumat təqdim olunur, Azərbaycanın milli şirniyyatlarını dequstasiya etmək imkanı yaradılır.

Sərgidə Çin və digər iştirakçı ölkələrin turizm sənayesi nümayəndələri ilə görüşlər və media nümayəndələri ilə müsahibələr təşkil edilir.

Həmçinin mayın 16-da Azərbaycan Turizm Bürosu “China Outbound Tourism Research Institute” (Çin Xarici Turizm Araşdırmaları İnstitutu) tərəfindən təşkil olunmuş “Chinese Tourist Welcome Award 2024” (Çin Turist Qəbulu Mükafatı) müsabiqəsində “Potensial turizm destinasiyası” kateqoriyasında birinci yerə layiq görülüb.

Qeyd edək ki, 2023-cü ildə Azərbaycana səfər edən Çin vətəndaşlarının sayında 2022-ci ilə müqayisədə 6 dəfədən çox artım müşahidə edilib.