Əmək və Əhalinin Sosial Müdafiəsi Nazirliyi yanında Dövlət Məşğulluq Xidməti tərəfindən rayon (şəhər) Məşğulluq mərkəzlərinin peşəyönümü üzrə məsləhətçiləri üçün təlimlərə start verilib.
Nazirliyin İctimaiyyətlə əlaqələr və kommunikasiya şöbəsindən verilən məlumata görə, xidmətin Göyçay rayonundakı Regional Peşə Təhsili Mərkəzində təşkil olunan təlimdə Ağstafa, Balakən, Şabran, Masallı, Kürdəmir, Goranboy, Qazax, Şəmkir, Xocalı, Qobustan, Lənkəran, Zərdab, Quba, Oğuz, İsmayıllı və Gəncənin Kəpəz rayon Məşğulluq mərkəzlərindən ümumilikdə 16 əməkdaş iştirak edir.
Təlim iştirakçılarına psixoloq və ekspertlər tərəfindən peşəyönümü üzrə mütəxəssis, peşəyönümü üzrə praktik fəaliyyətin həyata keçirilməsi, məsləhət xidmətinin göstərilməsi, peşələrin təqdimatı və peşə maraqlarının diaqnostikası kimi mövzular tədris edilir.
Məqsəd məşğulluq orqanlarında qeydiyyatda olan işaxtaran və işsiz şəxslərə, eləcə də təhsil müəssisələrinin şagird və tələbələrinə peşəyönümü məsləhət xidmətlərinin göstərilməsi işini təkmilləşdirməkdir. Təlimlərin sonunda iştirakçılara sertifikatlar veriləcək.