Azad olunan ərazilərdə 116 574 ədəd mina və hərbi sursat aşkarlanıb

Vətən müharibəsi başa çatandan indiyədək işğaldan azad olunmuş ərazilərdə çox böyük işlər görülüb.

Bunu Azərbaycan Minatəmizləmə Agentliyinin İdarə Heyətinin sədri Vüqar Süleymanov 4 Aprel - Beynəlxalq Mina Xəbərdarlığı və Mina Təhlükəsi ilə Mübarizəyə Yardım Gününə həsr olunan mətbuat konfransında deyib.

O qeyd edib ki, indiyə qədər 129 min 831 hektar ərazi minalardan təmizlənib. Ümumilikdə, 116 574 ədəd mina və partlamamış hərbi sursat aşkarlanıb.

V.Süleymanov söyləyib ki, dünyanın 60-dan çox ölkəsində 110 milyondan çox mina basdırılıb: "Azərbaycan da mina problemi ilə üz-üzədir. 30 illik işğal dövründə düşmən torpaqlarımızda 1.5 milyona qədər mina basdırıb. Müharibədən dərhal sonra azad olunmuş ərazilərdə minalardan təmizləmə prosesi başlanıb".