Bu gün “Yüksəliş” müsabiqəsinin əyani mərhələsinin imtahanları keçirilib. İmtahan Təhsil Nazirliyi, Gənclər və İdman Nazirliyi və Dövlət İmtahan Mərkəzinin dəstəyi ilə 11 regionda təşkil olunmuş 24 imtahan mərkəzində aparılıb. Əyani mərhələyə keçmiş 940 namizəddən 867 nəfəri imtahana qatılıb.
Əyani mərhələ “Qabiliyyət üzrə yoxlama” və “İdarəetmə bacarıqları” üzrə 2 imtahandan ibarət olub. Qaydalara əsasən, 2 saat ərzində keçirilən “Qabiliyyət üzrə yoxlama imtahanı”nda iştirakçılardan onlayn mərhələnin qabiliyyət imtahanında doğru cavablandırdığı sualların ümumi sayının ən azı 70 faizini, bloklar üzrə ayrı-ayrılıqda doğru cavablandırdığı sualların isə ən azı 50 faizini təkrar etmək tələb olunub. Əyani mərhələnin imtahanlarına qatılan 867 namizəddən 728 nəfəri “Qabiliyyət üzrə yoxlama imtahanı”ndan uğurla keçərək “İdarəetmə bacarıqları üzrə imtahan”a buraxılıb.
Qeyd edək ki, əyani mərhələnin “Qabiliyyət üzrə yoxlama imtahanı”nın nəticələri iştirakçılara həmin gün təqdim olunub. “İdarəetmə bacarıqları üzrə imtahan”ın nəticələri 2 həftə müddətində yoxlanılıb iştirakçıların şəxsi elektron kabinetinə göndəriləcək. İmtahanlarda ən yüksək nəticə göstərən 300-dək iştirakçı müsabiqənin növbəti mərhələsi olan yarımfinalda iştirak etmək hüququ qazanacaq.
İmtahan Tibbi Ərazi Bölmələrini İdarəetmə Birliyinin (TƏBİB) “İmtahanlar zamanı koronavirus infeksiyasının (COVID-19) profilaktikasına dair” metodiki göstərişləri nəzərə alınmaqla hazırlanmış təlimata uyğun təşkil edilib. Temperaturu 37°C-dən yuxarı olan iştirakçı qeydə alınmayıb.
“Yüksəliş” müsabiqəsinin işçi qrupunun rəhbəri Fərhad Hacıyev deyib ki, bugünkü imtahan 2 hissədən ibarət olub - yoxlama və idarəçilik qabiliyyətini müəyyən edən əsas imtahan: “Yoxlama imtahanında müəyyən bal toplamayan digər imtahana keçməyəcək. STİK iştirakçılara 4 blok üzrə sual verilir, hər blok üzrə vaxt ayrılıb ki, bu, ilk dəfə tətbiq olunan mexanizmdir. ABŞ və Kanada təcrübəsinə uyğun suallar götürülüb. Xüsusi psixoloji test də keçiririk, 75 belə test verilib. Bununla onların psixoloji portreti bilinəcək. Əsas məqsəd kadr formalaşdırmaqdır”.
Xatırladaq ki, “Yüksəliş” müsabiqəsi 21-51 yaş aralığında, 2 illik idarəçilik təcrübəsi olan, ali təhsilli Azərbaycan Respublikasının vətəndaşlarını əhatə edir. Müsabiqə 5 mərhələdən - qeydiyyat, onlayn seçim, əyani, yarımfinal və finaldan ibarətdir. Müsabiqədə 11.760 nəfər qeydiyyatdan keçib. Onlardan 9.775 nəfər müsabiqəyə qəbul edilib.
“Yüksəliş” müsabiqəsi Prezident İlham Əliyevin 26 iyul 2019-cu ildə imzaladığı Sərəncamla intellektual səviyyəsi və idarəçilik bacarıqları yüksək olan perspektiv rəhbər şəxslərin müəyyən edilməsini, dəstəklənməsini və ölkədə kadr ehtiyatı bankının yaradılmasını təmin etmək məqsədilə təsis olunub.
Əntiqə Fərəcova, Atababa Vəliyev